ISO સંચાલન તંત્રવ્યવસ્થા પ્રમાણિકીકરણ સ્ટાન્ડર્ડ્સ : વ્યંગ્ય નજરે [૨]

૧૫-૧૦-૨૦૧૯ના અંકમાં ISO સંચાલન તંત્રવ્યવસ્થા પ્રમાણિકીકરણ સ્ટાન્ડર્ડ્સના સંદર્ભમાં વાત કરતાં આપણે વિશ્વ સ્ટાન્ડરડ્સ દિવસની ઉજવણીની વાત પણ કરી હતી. તેના ભાગ રુએ દર વર્ષે એક પ્રતિયોગિતા પણ યોજવામાં આવે છે જેમાં એ વર્ષનાં થીમને અનુરૂપ સૌથી વધારે અસરકારક વિડીયોને સન્માનવામાં આવે છે.

વર્ષ ૨૦૧૯ માટે આ માન ઈરાનના મોહમ્મદ ખોદાદાદીને જાય છે. તેમણે સંવર્ધિત વાસ્તવિકતા ટેક્ન્લોલોજિનો ઉપયોગ શિક્ષણના ક્ષેત્રમાં કેમ કરી શકાય તે દર્શાવ્યું છે. તેમણે બનાવેલ વિડીયોમાં તબીબી શાખાનાં વિદ્યાર્થીને ખુલ્લાં હૃદય વિશે સમજવામાં સંવર્ધિત વાસ્તવિકત કેમ ઉપયોગી બનાવી શકાય તે દર્શાવ્યું છે.

હવે, કેટલાંક અન્ય વ્યંગ્ય ચિત્રોને માણીએ

ઈજિપ્તના ગંજાવર પિરામીડ જોઈને સૌથી પહેલો સવાલ એ થાય કે ‘એ શી રીતે બાંધ્યા હશે?’ પણ અહીં પિરામિડ બાંધનારા કહે છે, ‘પિરામિડ બનાવવા કરતાં અઘરું હતું આઈ.એસ.ઓ. પ્રમાણપત્ર મેળવવું.’ પ્રમાણિકીકરણની પ્રક્રિયા ખરેખર આટલી મુશ્કેલ છે કે નહીં તે મહત્ત્વનું નથી, પણ એક વર્ગની માન્યતા આ રહી છે એ હકીકત છે.

આ કાર્ટૂન શૉન મેકૉલીગ/Shaun McCallig નું છે.

****

ISO પ્રમાણિકીકરણ હકીકતમાં સાધન છે, જે આ પડકારો ઝીલવા માટે પધ્ધતિસરનો, સાતત્ત્યપૂર્ણ માર્ગ બતાવે છે. પણ તેને સાધ્ય માનીને વ્યાપાર-ઉદ્યોગના બધા પડકારોની સામે તેને ધરી દેવાથી હલ નથી નીકળવાના ! આટલી સાદી વાતને ન સમજવાવાળો વર્ગ પણ છે. અહીં એ વર્ગને માટે સંદેશ છે.

પી.કે./PK નામના આ કાર્ટૂનિસ્ટ વિશે વિશેષ જાણકારી ઉપલબ્ધ નથી.

****

વ્યાપાર-ઉદ્યોગનાં ઝડપથી બદલાતાં પરિબળોની અનિશ્ચિતતાથી ટેવાયેલો વ્યાવસાયિક દરેક પ્રસ્તાવમાં ‘જો અને તો’ની છટકબારીઓની સલામતી એટલી હદે શોધતો થઈ ગયો છે કે લગ્નના પ્રસ્તાવ જેવી અંગત બાબતમાં પણ તે એને ટાળી નથી શકતો.

****

નવા નિયમનને કારણે સંસ્થાના દસ્તાવેજીકરણમાં થતા થોકબંધ ફેરફારો પર અહીં કટાક્ષ છે.

****

પ્રમાણિકીકરણ ઑડીટમાં આવશ્યકતાની પૂર્તિ ન થઈ હોય એવા વધારેમાં વધારે કિસ્સા ટાંકી શકો તો જ તમે સારૂં ઑડીટ કર્યું ગણાય. વ્યાવસાયિકોના એક વર્ગની આવી માન્યતા પર અહીં કટાક્ષ કરાયો છે.

****

પ્રમાણિકીકરણ ઓડીટ ભલે કોઈ પ્રક્રિયા આધારિત હોય, છતાં માનવ સહજ અહં નજરે પડતો જ હોય છે ! સાહેબ અહીં સાહેબ જ રહે છે.

****

ISO  સ્ટાન્ડર્ડ્સ સાથે સંકળાયેલાં પ્રમાણિકીકરણ, અમલીકરણ અને ઑડીટ જેવાં વિવિધ વ્યાવસાયિક ક્ષેત્રોની દુનિયાનાં વ્યંગ્યચિત્રો દ્વારા આ ક્ષેત્રોની ગતિવિધિઓની મુશ્કેલીઓ અને આનંદોનો વાંચનારને અંદાજ આવ્યો હશે એવી આશા સાથે 'માનકોના માનભંગને આટલેથી અટકાવીએ.